Meänkieli
Ruottin säteilyturvavirasto oon hallituksen alainen ja kuuluu Ilimasto- ja elinkeinoministeriön vastuualueeseen. Meilä oon kokohnaisvastuu säteilysuojelusta ja ydinturvallisuudesta. Viranomhainen tekkee ennaltaehkäisevää työtä sen etheen, ette suojata ihmisiä ja miljöötä säteilyn ei-toivotuista efekteistä, nyt ja tulevaisuuessa.
Meilä oon rapeat 300 henkilöä töissä ja niilä oon näitten aloitten komppetensiä: tekniikka, luonontieteet, käyttäytymistieteet, juritiikka, talous ja kommunikasuuni.
Koko aijan met freistaama kehittää meän toimintaa jatkuvalla parantamistyöllä, jossa meän lähtökohtana oon määrätyt stantartit, ko oon kyse kvaliteetista, miljööstä ja työmiljööstä.
Valtiopäivät ja maan hallitus päättä Säteilyturvaviranomhaisen tehtävästä ja pytjetistä, mutta aivan ko muutki viranomhaiset met päätämä ittenäisesti yksityisissä asioissa. Säteilyturvaviranomhaisen pytjetti oon suunile 660 miljoonaa kruunua vuessa. Toiminta rahotethaan suurimmaksi osaksi maksoila ja muuten verorahoila.
Viranomhaista johtaa jeneraalitirektööri Michael Knochenhauer, jonka maan hallitus oon valinu.